Suliniuteqarfiit

Qulaajaanerni atortut ineriartortinneqarnerat

Naqinnernik ilisarsisinnaannginnermut allatigullu atuarniarnermik ajornartorsiuteqarnermut qulaajaatit ullumikkut pisariaqartinneqarput. Misiligutit kalaallisut oqaasertallit ukiuni amerlasuuni ujartorneqartarput. Taakkuja pigitinnagit ikiorsiinissamut ikorfartuinissamullu periarfissat annertuumik killeqarput — taamaattumillu soorlu Innarluutillit pillugit inatsimmi piumasaqaataasut naapertorlugit uppernarsaateqarnissamut piumasaqaatit naammassinissaat ajornakusoortuuvoq.

Suliniuteqarfik ukuninnga suliniarfiuvoq:

• Naqinnernik ilisarsisinnaannginnermut misiligummik kalaallisut oqaasertalimmik ineriartortitsineq

• Nukarliit alloriarfianni pasitsassiniutit digitaliseerernissaat

• Allannikkut atuarnikkullu ajornartorsiutit qulaajaaffiginissaannut atortunik ineriartortitsineq

• Qallunaat naqinnernik ilisarsisinnaannginnermut misiligutaannut isersinnaalernissaq

Ikiuutit kalaallisut oqaasertallit ineriartortinneqarnerat

Atortunik kalaallisut oqaasertalinnik ineriartortitsinissaq pisariaqartinneqarpoq – pingaartumik naqinnernik ilisarsisinnaanngitsunut atuarnermut allannermullu teknologiinik. Teknologiit qallunaatut tuluttullu oqaasertallit amerlasuut ikiuutigilereerpaat, taamaattorli piviusumik naligiissitsoqassappat sakkut kalaallisut oqaasertallit pisariqarput.

Ikiorsiissutit nutaat pisariitsuusussaapput atoruminartuussallutillu, aammattaaq ilitsersuutit paasiuminartut tunniunneqartussaapput.

Suliniuteqarfik ukuninnga suliniarfiuvoq:

• Atuarnermut allannermullu sakkunik ikorfartuutaasunik, oqaatsini arlariinni atorneqarsinnaasunik atuutsitaqalerniarneq

• AiRO pillugu ilisimatusartut suleqatigiinneranni peqataaneq — taassuma kalaallisuuanik ineriartortitsinissaq siunertaralugu. AiRO ilinniagaqarnermut sakkuuvoq, siusissukkut naqinnernik ataasiakkaarinermut naqinnernillu ilisarsisinnaannginnermut uppernarsaatitalimmik sunniuteqartartoq

• Kalaallit Nunaanni innuttaasunut AI tunngavigalugu oqalunnermik ilisarsiniummik nalilersuineq.

Inatsiseqarnikkut suliniutit

Ullumikkut Kalaallit Nunaanni immikkut inatsiseqanngilaq, inuit naqinnernik ilisarsisinnaanngitsut allatigullu atuarniarnerminnik allanniarnerminnillu ajornartorsiutillit pisinnaatitaaffiinik qulakkeerinnittumik. Inuit naqinnernik ilisarsisinnaanngitsut Innarluutilinnut inatsisit aqqutigalugu sullinneqartarput, inatsisilli amigaateqarput ersarluttuullutillu – pingaartumik inuusuttunut inersimasunullu tunngassuteqartuni.

Naqinnernik ilisarsisinnaannginnermut misiligutip atuutsinneqalerneratigut inatsisitigut atugassarititaasut pisariaqarluinnalissapput. Inatsisitigut suliniutit ilaatigut misilitsissinnaaneq kingornatigullu ikorfartorneqarnissaq qulakkiissavaat, ikorfartuutit qanoq aallartinneqartarnissaat aningaasalerneqartarnissaallu ilanngullugit, kiisalu misilitsinnerni paasissutissat pissarsiarineqartut qularnaatsumik paarineqartarnissaat inatsisitigut qulakkeertussaavoq.

Inatsisiliat 2027-imi naammassineqarnissaat naatsorsuutigineqarpoq, 2027/2028-mi atuutsilersinneqarnissaat siunertaralugu.

Suliniuteqarfik ukuninnga suliniarfiuvoq:

• Suleqatigiinik immikkut ilisimasalinnik inuttalimmik, naalakkersuisoqarfinnit, aqutsisoqarfinnit suliffeqarfinnillu allanit inuttalerneqartussamik pisersitsinissaq; taakkua Ilinniartitaanermut Naalakkersuisoqarfiup inatsisiliassanik suliaqarnerani ikiussavaat

• Inatsisissatut siunnersuutinik nutaanik suliaqarneq.

Ilisimasat qaffasinnerusut piginnaasaqarfinnillu qaffassaanerit

Inuit naqinnernik ilisarsisinnaannginnermik allatigullu atuarniarnikkut allanniarnikkullu ajornartorsiuteqartut pillugit immikkut ilisimasallit amigaatigineqarput. Tamatuma politikkikkut anguniakkat angujuminaatsilerpaat.

Piginnaasanik ineriartortitsineq atuarfiit, suliffeqarfiit aamma allat tassunga tunngassuteqartut akimorlugit nukittorsaasoqassaaq.

Suliniuteqarfik ukuninnga suliniarfiuvoq:

• Ilinniarfissuarmi allannikkut oqaatsit ajornartorsiutaasarnerannik ilisimasat annertusarneqassapput

• Naqinnernik ilisarsisinnaannginnermut ilitsersuisup misilitsinnernik piginnaasaqartup piginnaasai ineriartortinneqassapput

• Ilinniarfinni tamani atuartitsisut ilitsersuisullu piginnaasaqarfiinik ineriaratortitsisoqassaaq

• Pisortat ingerlatsiviillu paasisitsiniaanernik ingerlatsiffiussapput

• Ilinniartitaanermut Aqutsisoqarfimmi dysleksimut immikkoortortaqarfiup ataavartunngortinnissaa ilisimasaqarfittullu pinersinneqarnissaa sulissutigineqassaaq.