Oqaatsinik paasinninneq
Oqaatsinik paasinninneq ilinniarnermut, atugarissaarnermut peqataanermullu ammaassisarpoq. Atuartut oqaatsinik paasinninnermik ajornartorsiuteqartut piaartumik siunnerfilimmillu ikorfartorneqarnissartik pisariaqartittarpaat — allat taamaaqqatigalugit ineriartornissaminnut periarfissaqarniassammata.
Indhold
Oqaatsinik paasinninneq suua?
Oqaatsinik paasinninneq oqaatsit, oqaaseqatigiit aamma allatat isumaannik paasinnissinnaaneruvoq. Piginnaasaq taanna tunngaviusumik piginnaasaavoq, nutaanik ilikkaqarnissamut aamma attaveqaqatigiinnissamut periarfissaqalersitsisoq aamma inoqqatigiinni inooqataanissamut peqataalersitsisoq – atuarfiup iluani avataanilu.
Atuartut oqaatsit paasinissaannik ajornartorsiuteqartut atuartitsineq malinnaaffigiuminaatsittarpaat, ilitsersuutt paasiuminaatsittarpaat oqaatiginiakkatillu ersarissumik oqaatiginissaat ajornartorsiutigisarlugu. Tamatuma ilinniakkatigut ineriartornerat, imminnut tatiginerat atugarissaarnerallu sunniuteqarfigisarpaa.
Sooq pingaaruteqarpa?
Oqaatsinik paasinnilluarsinnaaneq atuarnissap allannissallu ilinniarnissaannut pisariaqartuuvoq. Atuartut oqaatsitigut piginnaasaqarluarlutik atualersut allatanik paasinninnissartik oqinnerutittarpaat atuartitsinerlu malinnaaffigisinnaallugu.
Atuartut oqaatsinik paasinninnissamik ajornartorsiuteqartut oqaatsit taakkualu isumaat imminnut ataqatigiissinnissaat ajornartorsiutigisarpaat — tamannalu kingusinnerusukkut atuarnikkut ajornartorsiuteqarnermik pilersitsisinnaasarpoq.
Ajornartorsiutit angerlarsimaffianni killilimmik oqaatsitigut atuinermik imaluunniit oqaatsit ilinniarniarnerannnik ajornartorsiuteqarnermik, soorlu DLD-mik, peqquteqarsinnaasarpoq.
DLD (Developmental Language Disorder) meeqqani, inuusuttuni inersimasunilu ineriartornikkut ajornartorsiutini siaruarsimanerpaajuvoq — taamaattorli amerlanerpaat tusarnikuunngisaannarpaat.
Inuit DLD-qartut oqaatsit ilinniarnissaat, paasinissaat, atornissaat pilersinnissaallu ajornatorsiutigisarpaat. Ajornartorsiutit taakkua assigiinngitsorujussuusinnaapput: ilaasa oqaatsit eqqaamajuminaatsittarpaat, allat oqaaseqatigiit paasiuminaatsittarpaat, ataqatigiissumik oqaluttuarsinnaasaratik imaluunniit ilitsersuutit imartuut malinnaaffiginissaat ajornartorsiutigisarlugit.
Oqaatsinik paasinninnermik ajornartorsiutit tamatigut saqqumisuusanngillat. Amerlasuut DLD-qartut eqarinagu oqalussinnaasarput, taamaattorli oqaatsit oqaaseqatigiillu tusakkamik atuakkamilluunniit isumaat tamatigut paasineq ajorpaat. Tamatuma kingunerisinnaasarpai:
oqaloqatigiinnerni malinnaasinnaanermik ajornartorsiuteqarneq
allatat ilitsersuutillu paasinissaannik ajornartorsiuteqarneq
inooqatigiinnikkut unamminartorsiorneq
oqaatsit pigiliussat killeqarneri aamma nassuiaatit ersarluttut
Paasinninnissamut oqaatiginninnissamullu piumasaqaatit annertusigaangata, ajornartorsiutit amerlanertigut ersarinnerulersarput.
Suliniutit ikorfartuinerillu
DLD oqaatsinillu paasinninnermik ajornartorsiutit peerneqarsinnaanngillat — atuartulli eqqortumik ikorfartorneqarlutik malunnartumik ineriartorsinnaapput. Suliniutit pingaarnerpaat pingasut ukuusariaqarput:
Oqaatsinik suliaqarneq
Oqaatsit pigiliussat, oqaaseqatigiit aamma oqaluttuat anguniagaqarluni sungiusarneqassapput.
Atuartitsinermi tulluarsaanerit
Aaqqissuusat ersarissuussapput, takussutissaqartitsilluni ikorfartuisoqassaaq aamma ilitsersuutit naatsuussapput ersarissuullutillu.
Ilinniartitsinerit peqataatitsiffiusut
Oqaatsit ikorfartorluarneqassapput, atuartullu tamarmik peqataanissaminnut periarfissaqarlutik.
Allatat NVOL.dk -mit atugassiarineqarput.